اک اک کمرہ نَو نَو جی

اک اک کمرہ نَو نَو جی
جائیے کدھر؟ کریئے کی

حاجت لئی میں لین بنائی،گھنٹے مگروں واری آئی
واری میری لیٹ لوائی، فاقے خون جگر دا پی
اک اک کمرہ نو نو جی

بجلی دا بلّ دونا آیا، نلکے دا بلّ دون سوایا
بل گیس دا نال کرایہ، اک منجی دی ٹٹّ گئی ہِیں
اک اک کمرہ نو نو جی

پاؤ آلو تے لمّا شورا، گھر والی نوں لگا جھورا
برکی ڈگدی بھورا بھورا، برکت ویکھی ڈیپو دی
اک اک کمرہ نوں نوں جی

بھین بھنیویں پے گئی چھتیں، باؤ مامے تے چھک نہیں دتی
ایس ورھے وی شرط نہ جِتی، پتر منگیا ہو پئی دھی
اک اک کمرہ نو نو جی

گھیؤ مہنگا رمضان 'چ آٹا، آڑھتیاں دا موٹا گاٹا
ماڑے نوں ہر پاسیوں گھاٹا، دو عیداں تے روضے تیہہ
اک اک کمرہ نو نو جی

اک کمرے وچ داج نونہاں دا، سوہرا باہر تے راج نونہاں دا
مکدا نہیں کم کاج نونہاں دا، تیجی آئی تے پے گئی پیہ
اک اک کمرہ نو نو جی

اک کمرہ تے ڈھیر پروہنے، سوندے ہو کے اونے پونے
سدھے ہون تے ہو جان چونے، اک دوجے نال ہوئے فری
اک اک کمرہ نو نو جی

اک کمرے وچ ستر نہ رہندا، پیو کھنگھے تے پتّ اٹھ بیہندا
پتّ جا نونہہ توں لیکھا لیندا، اُسّلوَٹّے لیندی دھی
اک اک کمرہ نو نو جی

سبھ دا ہو گیا پردہ سانجھا، وچ دہلیزاں سوں گیا رانجھا
پنج چھ بال لیایا بھانجا، تنگ ویہڑے تے بندے ویہہ
اک اک کمرہ نو نو جی

ہر نکرے اک شور شرابا، بوہتے بال نہ من دے دابا
ہتھ اٹھاراں اک وے چھابا، تِنّ پتر تے دھیاں چھی
اک اک کمرہ نو نو جی

جی پی فنڈ لے لیف بنائے، اگلے سال اوہ کم نہ آئے
اڈوانساں نے دل ادرائے، باقی رہِ گئے اٹھ سو تیہہ
اک اک کمرہ نو نو جی
جائیے کدھر ؟ کریئے کی؟

حوالہ: ﷲ میاں تھلے آ؛ صفحہ 49