ماں بولی

لکھ پنجابی پڑھ پنجابی
بول پنجابی بول
مِٹھڑے مِٹھڑے رس بھریچے
ماں بولی دے بول

ماں بولی وچ ہیر دا قصہ
یوسف دی تفسیر دا قصہ
رانجھے دی تقدیر دا قصہ
لکھیا وارث پیر دا قصہ

سوہنے حرف ورتوں
کِتے نہ آوے جھول
لکھ پنجابی پڑھ پنجابی
بول پنجابی بول

جنے پنجابن دُلّا بھٹی
بھردا نہ غیراں دی چَٹی
لا غلامی چادر سَٹی
توڑ دِتی اکبر دی ہٹی

سبھ راٹھاں نوں سدھے گھل کے
بیٹھا در نُوں کھول
لکھ پنجابی پڑھ پنجابی
بول پنجابی بول

اس راہیں بُلھا یار مناوے
کافی انگ دے گیت سُناوے
بول پنجابی عرش ہلاوے
شعراں راہیں گُنی کہاوے

اللّہ والے بولن ایہنوں
توں وی ایہنوں بول
لکھ پنجابی پڑھ پنجابی
بول پنجابی بول

ایہہ بولی راہکاں دی بولی
انگاں تے ساکاں دی بولی
ہیراں تے چاکاں دی بولی
دُنیا دے گاہکاں دی بولی

لَے نہ جاون ایہدیاں جِنساں
وِچ تکڑی دے تول
لکھ پنجابی پڑھ پنجابی
بول پنجابی بول

ایس بولی وچ گُھگھی بولے
یُوسف دا دل کھوہ وچ ڈولے
دُکھی جِندڑی کھائے ہِچکولے
نویں نویں ایہہ نکتے ٹولے

کیہ آہندی پئی کرماں ماری؟
کون کرے پڑچول
لکھ پنجابی پڑھ پنجابی
بول پنجابی بول

پنجابی بول پنجابن جایا
دھرتی تیری رزق کھڈایا
جتھے وی توں قدم ٹکایا
توں ایں سارا جگ رچایا

دُنیا نوں تُوں آپ رجاویں
پھڑ نہ ہتھ کشکول
لکھ پنجابی پڑھ پنجابی
بول پنجابی بول