ویہلا منڈا

جیہڑا منڈا گھر چوں ویہلا اے
اوہ سبھ توں ہی البیلا اے

لاہ کپڑے نُکریں سُٹدا اے
بالاں نوں پھڑ پھڑ کُٹدا اے
تڑھیاں اوہ پیو نوں لاہندا اے
ماں دی اوہ گُتھلی لُٹدا اے
ماں بکری سی اوہ لیلا اے
جیہڑا منڈا گھر 'چوں ویہلا اے
اوہ سبھ توں ہی البیلا اے

پیسے بن دل نہ لگدا اے
ہر ویلے خرچہ منگدا اے
نہ دئیے خطرہ جنگّ دا اے
نہ گالاں کڈھنوں سنگدا اے
ایہہ چڑھیا نِمّ کریلا اے
جیہڑا منڈا گھر 'چوں ویہلا اے
اوہ سبھ توں ہی البیلا اے

سمجھے کہ رانجھا جھنگ دا اے،
ہر بوہے اگے کھنگھدا اے
سوہنا جیہا رشتہ منگدا اے،
آکڑ کے گلیوں لنگھدا اے
پر رانجھے وانگوں ویہلا اے
جیہڑا منڈا گھر 'چوں ویہلا اے
اوہ سبھ توں ہی البیلا اے

گلّ کنّ وچّ دسّے بھابی نوں
جیویں بھورا پھلّ گلابی نوں
پیا پکا کردا لابی نوں
کی دسئیے ایس عذابی نوں
اج گھر نہ پیسہ دھیلا اے
جیہڑا منڈا گھر 'چوں ویہلا اے
اوہ سبھ توں ہی البیلا اے

ایہہ سبھ توں شوکا باکا اے
ستّ لڑیا جنگ پٹاکا اے
اجے بے بے لئی ایہہ کاکا اے
ممنوعہ ریڈ علاقہ اے
ایہہ منڈا نہیں دھڑبیلا اے
جیہڑا منڈا گھر 'چوں ویہلا اے
اوہ سبھ توں ہی البیلا اے

اکّھ رکھے ہر مٹیار اُتے،
گھر جی نہ لگے کار اُتے
ریہندا ایہہ عشقَ ونگار اُتے،
کٹدا ایہہ جندڑی لار اُتے
ایہہ گھر لئی کھوٹا دھیلا اے
جیہڑا منڈا گھر 'چوں ویہلا اے
اوہ سبھ توں ہی البیلا اے

ہر کم 'چوں کڈھنے کیڑے نے،
ہر ویلے دھوتے لِیڑے نے
سونے دے لگے بِیڑے نے،
کھیسے وچ نوٹ نپیڑے نے
ایہدے کئی سہیلے ایہہ سہیلا اے
جیہڑا منڈا گھر 'چوں ویہلا اے
اوہ سبھ توں ہی البیلا اے

ایہنوں شوق کبوتر بازی اے
گُڈیاں پیچاں دا غازی اے
بڑا روشن ایہدا ماضی اے
کوٹھے تے ریہندا راضی اے
ایہنوں گامے بنھیا سیہلا اے
جیہڑا منڈا گھر 'چوں ویہلا اے
اوہ سبھ توں ہی البیلا اے

سودے 'چوں پیسے ٹکدا اے
منع کریئے تے پھر رکدا اے
متھے توں لٹ نہ چکدا اے
موڈھے توں تُھکاں تھکدا اے
ایہہ گھر لئی کھوٹا دھیلا اے
جیہڑا منڈا گھر 'چوں ویہلا اے
اوہ سبھ توں ہی البیلا اے

مورت تے دل بھرماؤندا اے،
باری چوں تاڑی لاؤندا اے
ایہہ گیت ہجر دے گاؤندا اے،
گھر وانگ طوفان دے آؤندا اے
اک تیز سیلابی ریلا اے
جیہڑا منڈا گھر 'چوں ویہلا اے
اوہ سبھ توں ہی البیلا اے

ہتھ پھیر کے منہ ایہہ دھو لیندا،
گھیؤ لگی روٹی کھوہ لیندا
بھیناں نوں گلِّیں موہ لیندا،
چنگی جیہی بوٹی ٹوہ لیندا
ایہہ منڈا نہیں اک میلہ اے
جیہڑا منڈا گھر 'چوں ویہلا اے
اوہ سبھ توں ہی البیلا اے

ہر جی توں دُونا خرچہ سو،
ہر تھانے دے وچ پرچہ سو
خورے کتھے کتھے یاری سو،
ہر گلی محلے چرچہ سو
ہر کوچے ایہدا چیلا اے
جیہڑا منڈا گھر 'چوں ویہلا اے
اوہ سبھ توں ہی البیلا اے

انگلش 'چ غرارے کردا اے
اردو چ ترارے بھردا اے
ڈسکو وچ ڈبدا تردا اے
ماں بولی کولوں ڈردا اے
ماں دھرتی گود سوتیلا اے
جیہڑا منڈا گھر 'چوں ویہلا اے
اوہ سبھ توں ہی البیلا اے

ویلے سر مٹھا ہو جاوے،
کم نکلے چھپّ کھلو جاوے
نیناں دے بوہے ڈھو جاوے،
غرضاں دا بندہ ہو جاوے
بند ہری چھیل دا کیلا اے
جیہڑا منڈا گھر 'چوں ویہلا اے
اوہ سبھ توں ہی البیلا اے