ہسپتال

توں
ہسپتال دے سرجیکل وارڈ دے icu وچ
اک بیڈ تے لما پیا مرن دی تیاری پھڑ رہیا
اکھیں خالی، بلھ کھلے، ننگے پنڈے سوئیاں کھمبیاں
باہر لے مصنوعی ساہ تیرے اپنے ساہواں نوں
دھکے دیندے

زور لاون، ٹکراں مارن
حیاتی تے مکتی دا جھیڑا کردے
باہر بھوئیں تے ساک پرانے
ہنجواں دے ہڑھ وچ رڑھدے
سرگھی توں ڈیگر
ڈیگر توں رات
دکھ دا پینڈا کٹدے
پتھرائیاں اکھیاں نال

بُوہے نوں کھلدا
بند ہوندا تکدے
چار نمبر بیڈ نال کون اے
انھے واہ نس کے ویر بھجدا
کوئی خبر خیر دی سُنن دی چا وچ نسدا

لہو دی بوتل لے آو
کنا ہور لہو میرا ویر پئے گا
دُور کھلوتی بھین آہندی
کُجھ نہیں بننا
لہو تے ساہواں دے جھیڑے وچ
ساہواں نے ہرنا
سبھ نے اپنیاں راہواں ٹُرنا
ہسنا، کھیڈنا پر
ساکاں ، سنگیاں نیں جیہڑے
اوہدے نال جڑے سن
اوہدے نال ٹرے سن
اوہدے نال ہسے سن
اوہنوں یاد کر
روز نت جی جی مرنا
مر مر جیونا