امن لئی

اجے اساں امن لئی بڑا کجھ کرنا اے
اجے تساں کوریا دے وچ کی تکیا اے
اجے کئی تھاواں اسیں کوریاں بنانیاں
اجے کئی تھاویں اسیں لانیاں بجھانیاں
زِمیاں دے طبق اجے کئی اساں ساڑنے
اجے اساں کئی ہیرو شیماں نیں اجاڑنے
اجے گھٹّ اساں خورے کنیاں دا بھرنا اے
اجے اساں امن لئی بڑا کجھ کرنا اے

ٹینکاں نال اجے اساں زِمیاں نیں واہنیاں
واہ کے پھیر اجے اسیں سیاں کئیاں لانیاں
پانیاں دی تھاں لہو نال نے پیانیاں
امن دیاں سوکھیاں نہ فصلاں اگانیاں
گوڈیاں دے وچ رمبا کئیاں اتے دھرنا اے
اجے اساں امن لئی بڑا کجھ کرنا اے

جنگ دیاں ڈھولیاں توں سوڑیاں نہ پیا جے
بمب دیاں گولیاں توں سوڑیاں نہ پیا جے
کھنڈراں تے کھولیاں توں سوڑیاں نہ پیا جے
اساں بڑبولیاں توں سوڑیاں نہ پیا جے
امن دیاں بیڑیاں نے ڈُبّ کے ای ترنا اے
اجے اساں امن لئی بڑا کجھ کرنا اے