ایہہ کیہے دن آئے
ایہہ کیہے دن
آئے نی جندے
ایہہ کیہے دن آئے
گل مہکاں دی پا کے گانی
چیتر تُریا جائے نی جندے
ایہہ کیہے دن آئے؟
امبر دی اک تھندی چاٹی
صندلی پون مدھانی
ادھی راتیں رڑکن بیٹھی
چانن دھرت سوانی
چن دا پیڑا
کُھر کُھر جائے
سیک نہ وتر آئے نی جندے
ایہہ کیہے دن آئے؟
مہکاں دا اک مان سروور
کوسے جس دے پانی
رُت مٹیار
پئی وچ نہاوے
دُھپ دا پردہ تانی
دُھپ دا پردہ
ساہوں پتلا
انگ انگ نظریں آئے نی جندے
ایہہ کیہے دن آئے؟
سپنے جیکن پُھلاں لدی
مولسری دی ٹاہنی
جس رُتے ساڈا عشق گواچا
اوہ رُت چیتر مانی
تاہیوں رُت چوں
گیتاں ورگی
اج خوشبوئی آئے نی جندے
ایہہ کیہے دن آئے؟
رُتاں نوں مہکاں دا اوہلا
پر سانوں اج کیہڑا
رُتاں دے گھر چانن جائے
پر میرے گھر نھیرا
گلر دے پُھل کر کر جاون
چنبا کھڑ کِھڑ جائے نی جندے
ایہہ کیہے دن آئے؟
گل مہکاں دی
پا کے گانی
چیتر ٹریا جائے نی جاندے
ایہہ کیہے دن آئے؟
ایہہ کیہے دن آئے
حوالہ: کلامِ شِو؛ سانجھ؛ 2017؛ صفحہ 397 ( ویکھو )
