رات ادھی آر
ادھی پار ہے
سوچ میری وانگ ہی
بیزار ہے
ایہہ تاں مینوں ایوں پئی ہے بھاسدی
میرے واکن مرد ہے، نہ نار ہے
رات ادھی آر
ادھی پار ہے!

گلی گلی چمنے پتر پرائے
کس قدر ہوچھا جیہا رُزگار ہائے
ویل پچھوں سد لا کے آکھنا
ویل تیری ہور وی داتا ودھائے
کس قدر ،
اسچرج دی ہے گل ہائے
اک مانگٹ راجیاں نُوں خیر پائے
ہائے نہ داتا سمجھ آئے!

میری اپنی ویل خود بیکار ہے
ایہہ دھراں توں
زرد تے بیمار ہے
ایس نُوں نہ پُھل
نہ کوئی خار ہے!
میرے لئی ہے اجنبی لکھاں دی پیڑ
پیار دی مینوں بھلا کیہ سار ہے؟
لوریاں دینا
تاں اک رُزگار ہے
کام دی جاں پُورتی دا آہر ہے
رات ادھی آر
ادھی پار ہے

میرے واکن مرد ہے ، نہ نار ہے!

ہائے مینوں
کس گناہ دی ایہہ سزا؟
نہ میں آدم
تے نہ ہی میں حوا!
کام دا ہوندا ہے خورے کیہ مزا؟
آکھدے نیں:
کام ہوندا ہے خدا
کام وچ ہوندا ہے لوہڑے دا نشہ
پر ایہہ مینوں کیہ پتا!
کام دے دیوتے دی
مینوں تاں دھروں ہی مار ہے
جسم میرا رام لیلا
دا کو ئی کردار ہے
جس دے ہتھ وچ
کاٹھ دی تلوار ہے
چمکدی ہے ، پر نہ کوئی دھار ہے
جھوٹھا موٹھا کرنا جس نے وار ہے
رات ادھی آر
ادھی پار ہے
میرے واکن مرد ہے ، نہ نار ہے!

ہے منا!
نہ ہور لمی سوچ کر
سوچ لمی سنھ لانی پاپ ہے!
سماں ہی تاں زندگی دا باپ ہے!

اُٹھ ،
کہ سارے نیں ساتھی سوں رہے
سپنیاں دے شہر سبھے بھوں رہے
زندگی اک کام
دوجے کم بن
ہے منا بے کار ہے، بےکار ہے
اک وادھو بھار ہے
تینوں مر جانا ہی بس درکار ہے
رات ادھی آر
ادھی پار ہے
میرے واکن مرد ہے ، نہ نار ہے
رات ادھی آر
ادھی پار ہے

حوالہ: کلامِ شِو؛ سانجھ؛ صفحہ 285 ( ویکھو )