اج دِن چڑھیا تیرے رنگ ورگا
تیرے چُمن پِچھلی سنگ ورگا

ہے کِرناں دے وِچ نشہ جیہا
کسے چھینبے سپ دے ڈنگ ورگا
اج دِن چڑھیا تیرے رنگ ورگا

میں چاہونداں اج دا گورا دن
تاریخ میرے ناں کر دیوے
ایہہ دِن تیرے اج رنگ ورگا
مینوں امر جہاں وِچ کر دیوے
میری موت دا جُرم قبول کرے
میرا قرض تلّی تے دھر دیوے
اِس دُھپ دے پیلے کاغذ تے
دو حرف رسیدی کر دیوے

میرا ہر دیہوں دے سِر قرضہ ہے
میں ہر دیہوں توں کُجھ لینا ہے
جے ضرباں دیواں وہیاں نُوں
تاں لیکھا ودھدا جانا ہے

میرے تن دی کلّی کِرن لئی
تیرا سورج گہنے پینا ہے
تیرے چُلّھے اگ نہ بلنی ہے
تیرے گھڑے نہ پانی رہنا ہے

ایہہ دِن تیرے اج رنگ ورگا
مُڑ دِن دیویں مر جانا ہے

میں چاہونداں اج دا گورا دِن
اَنیائی موت نہ مر جاوے
میں چاہونداں اِس دے چانن توں
ہر رات کُلہنی ڈر جاوے
میں چاہونداں کسے تجوری دا
سپّ بن کے مینوں لڑ جاوے

جو قرض میرا ہے سمیاں سِر
اوہ بے شک سارا مر جاوے
پر دِن تیرے اج رنگ ورگا
تاریخ میرے ناں کر جاوے

اِس دُھپ دے پیلے کاغذ تے
دو حرف رسیدی کر جاوے

حوالہ: کلامِ شِو؛ سانجھ؛ 2017؛ صفحہ 457 ( ویکھو )