سُنیہا

کل نَویں جد سال دا
سُورج سنہرا چڑھے گا
میریاں راتاں دا تیرے
ناں سنیہا پڑھے گا
تے وفا دا حرف اِک
تیری تلی تے دھرے گا!

تُوں وفا دا حرف اک
دُھپ وِچ جے پڑھ سکی
تاں تیرا سورج میریاں
راتاں نوں سجدہ کرے گا
تے روز تیری یاد وِچ
اِک گیت سُولی چڑھے گا

پر وفا دا حرف ایہہ
اوکھا ہے ایڈا پڑھن نُوں
راتاں دا پَینڈا جھاگ کے
کوئی صدق والا پڑھے گا
اکھّاں چ سورج بیج کے
تے ارتھ اِسدے کرے گا

تُوں وفا دا حرف ایہہ
پر پڑھن دی کوشش کریں
جے پڑھ سکی تاں عشق تیرے
پیر سُچے پھڑے گا
تے تاریاں دا تاج
تیرے سیس اُپر دھرے گا

ایہہ وفا دا حرف پر
جے تُوں کتے نہ پڑھ سکی
تاں مُڑ محبت تے کوئی
اعتبار کیکن کرے گا
تے دُھپ وِچ ایہہ حرف پڑھنوں
ہر زمانہ ڈرے گا

دُنیا دے عاشق بیٹھ کے
تینوں خط جوابی لکھن گے
پُچھن گے ایس حرف دی
تقدیر دا کیہ بنے گا
پُچھن گے ایس حرف نُوں
دھرتی تے کیہڑا پڑھے گا

دُنیا دے عاشقاں نُوں وی
اُتر جے تُوں نہ موڑیا
تاں دوش میری موت دا
تیرے سر تے زمانہ مڑھے گا
تے جگ میری موت دا
سوگی سنیہا پڑھے گا!