رب جانے کوئی ہور ہے یا اوہو

رب جانے کوئی ہور ہے یا اوہو، عین بین پیا لگدا مِیت ورگا
پیا نال عقیدت دےویکھنا واں مُکھ اُجڑی ہوئی مسیت ورگا

پری پیار دے ویہڑے جے آن لتھے، بن جاندا اے جگ عفریت ورگا
کسے سوہنے دے قدمِیں دل رکھنا، کم ویریاں نال پریت ورگا

لگی توڑ نبھان دا عہد کرنا ہے، کم نماز دی نیت ورگا
وچ ہووے جے حرص ہوا شامل کوئی پاپ گناہ نہیں پِیت ورگا

وچ پِیڑ دا سیک جے نہ ہووے، جیون رہندا اے پوہ دے سِیت ورگا
کنِیں پوے آواز معشوق دی جاں، بن جاندا اے ہوکڑا گیت ورگا

رہوے روز پروہنے دی خبر دیندا، جُھوٹا نہیں کوئی کاگ پلیت ورگا
چلو کسے دے آون دی آس وی تاں، اندر چاننا رکھدی جِھیت ورگا

پتا نہیں کہ پایا سی کِس مرنے، ایہہ جِین دا راز کُریت ورگا
جانے کون کیہ بند اے پُڑی اندر، جِند راز اے مَڑھے تویت ورگا

کنڈ کرکے جگ دے مُونہہ ولّے رہے نچدے اوہدیاں سینتراں تے
سدا کُوڑ توں رہے تنویر نابر، اساں بھیڑ کمایا نہیں رِیت ورگا