اکو شہر چ رہندے ہویاں ایہہ دُوری وی چنگی نہیں مجبوری دا رولا چھڈو مجبوری وی چنگی نہیں ہس کے بولوتے سونہہ رب دی رب وی راضی ہُندا اے جھوٹھے موٹھے غصے چھڈو، ایہہ گھوری وی چنگی نہیں ہُن تے پوری دنیا اندر ایس تے بحثاں ہُندیاں نیں نِکّے نِکّے ہتھاں کولوں مزدوری وی چنگی نہیں حسن جوانی شخر دوپہر اے، اوڑک نوں ڈھل جانی اے آخر نوں پچھتاؤنا پوسی مغروری وی چنگی نہیں نظراں نال پلا دے طاہر، چانن ہووے من اندر تیرے ہُندیاں سُندیاں سجنا! بے نوری وی چنگی نہیں
