پیلے ککراں نال دھریکاں
نی میں ماہیا چُھپ چُھپ ویکھاں
آئے بدل کالے کالے
ساڈے کوٹھے تے پر نالے
نہاتے میں تے ماہیا نالے
سردی نال ہوئے بے حالے
بال کے جندڑی اگ پئے سیکاں
نی میں ماہیا چُھپ چُھپ ویکھاں
راتی باغاں نے وچ ڈیرے
ماہیا ہت پیا کرے لمیرے
نی میں ہوئی پرے پریرے
ونگاں بھج گیاں پہلے پھیرے
ہار کے سینے تے سر ٹیکاں
نی میں ماہیا چُھپ چُھپ ویکھاں
ماہیا رُسیا ہولے ہولے
رلیا غیراں وچ وچولے
مُڑ کے پیر نہ پایا ڈھولے
سڑیاں گڈریاں نال پٹولے
کیتا مندڑا تتیاں لیکھاں
نی میں ماہیا چُھپ چُھپ ویکھاں
