شاہ حُسین نال ٹاکرہ

شاہ حسینا آ جا بہہ جا
بات سنا کوئی سِگرٹ پی لے
دارُو والا گُھٹ نہ منگیں
اج اتوار اے
اپنا ڈیوڈ چُھٹی تے وے
مادھو لال دا ناں نہ لے لئیں
تخت لاہور ہُن اوہ نئیں بھائیا
سُرت دی سوئی نکّیوں ٹُٹ گی
پریم دا دھاگہ گُچھیو گُچھی

شاہ حسینا میریا سائیاں
میں تے کہنا ایداں کرلئو
پنڈی وال نال یاری رکھ لئو
برگر شرگر شکّر پڑیاں مُنڈے کُڑیاں

کوئی نئیں پُچھدا موجاں مارو

پھتُو شاہ صاحب نظریں پئے سن
طوطا پگ سی سِر دے اُپر
کالی کنجر کوٹی ڈاٹ کے
وچ پجیرو لِشک رئے سن
آکھ رئے سن

جھنگ شہر ہے مرکز اپنا
کیدو صاحب نئیں لیڈر اپنے
اوں تاں اپنا ای راج اے ہر تھاں
تھانیدار وی ساتھوں کمبن
اخباراں وچ اپنے بالک
ساندل بار دا کوئی اُچکّا
اپنے ہتھ چوں باہر نئیں رکھیا
رائے ونڈ وی جانا چائیدا
کدی کباریں
تپہ بوہت اڑھب ہے بھائیا
ہیٹاں اُتّے ہوجاندی ہے

شاہ حسین جی
پھتُو شاہ نوں کُجھ وی کہہ لئو
گل اخیرلی سچ کہندے نیں
تپہ بوہت اڑھب ہے بھائیا
ہیٹاں اُتے ہوجاندی ہے