ہیر وارث شاہ

کیدو باہوڑی تے فریاد کُوکے

کیدو باہوڑی تے فریاد کُوکے
دھیاں والیو کرو نیاؤں میاں

میرا ہٹ پساری دا لُٹیانیں
کول ویکھدا پِنڈ گراؤں میاں

میری بھنگ افیم تے پوست لُڑھیا
ہور نعمتاں دا کیہا ناؤں میاں

میری تساں دے نال نہ سانجھ کوئی
پِن ٹکڑے پنڈ دے کھاؤں میاں

طوطی باغ اُجاڑ دی میویاں دے
اَتے پھاہ لیاؤندے کاؤں میاں

وارثؔ شاہ میاں وڈے مال لٹے
کیہڑے کیہڑے دا لواں ناؤں میاں