ਰਲ਼ ਹੀਰ ਥੇ ਆਈਆਂ ਫੇਰ ਸਭੇ
ਰਾਂਝੇ ਯਾਰ ਤੇਰੇ ਸਾਨੂੰ ਘੱਲਿਆ ਈ
ਸੋਟਾ ਵੰਝਲੀ ਕੰਬਲੀ ਸੁੱਟ ਕੇ ਤੇ
ਛੱਡ ਦੇਸ ਪ੍ਰਦੇਸ ਨੂੰ ਚਲਿਆ ਈ
ਜੇ ਤੂੰ ਅੰਤ ਉਹਨੂੰ ਪਿੱਛਾ ਦੇਵਣਾ ਸੀ
ਇਸ ਦਾ ਕਾਲ਼ਜਾ ਕਾਸਨੂੰ ਸੱਲਿਆ ਈ
ਅਸਾਂ ਇਤਨੀ ਗੱਲ ਮਲੂਮ ਕੀਤੀ
ਤੇਰਾ ਨਿਕਲ਼ ਈਮਾਨ ਹੁਣ ਚਲਿਆ ਈ
ਬੇਸਿਦਕ ਹੋਈ ਐਂ ਸਿਦਕ ਹਾਰੀਵਈ
ਤੇਰਾ ਸਿਦਕ ਈਮਾਨ ਹਨ ਹੁਲੀਆ ਈ
ਉਹਦਾ ਵੇਖ ਕੇ ਹਾਲ ਅਹਿਵਾਲ ਸਾਰਾ
ਸਾਡਾ ਰੋਂਦੀਆਂ ਨੀਰ ਨਾ ਠੱਲਿਆ ਈ
ਹਾਏ ਹਾਏ ਮਿੱਠੀ ਫਿਰੇ ਨੇਕ ਨੀਤੀ
ਉਹਨੂੰ ਸਿੱਖਣਾ ਕਾਸਨੂੰ ਘੱਲਿਆ ਈ
ਨਿਰਾਸ ਦੀ ਰਾਸ ਲੈ ਇਸ਼ਕ ਕੋਲੋਂ
ਸਕਲਾਤ ਦੇ ਬਿਆਂ ਨੂੰ ਚਲਿਆ ਈ
ਵਾਰਿਸ ਹੱਕ ਦੇ ਥੋਂ ਜਦੋਂ ਹੱਕ ਖੁਥਾ
ਅਰਸ਼ ਰੱਬ ਦਾ ਤਦੋਂ ਤੁਰ ਥਲਿਆ ਈ