ڈاراں خوباں دیاں سیالاں دےمیل آئیاں
حُور پری دے ہوش گواوندیاں نیں
لکھ جٹیاں مُشک لپٹیاں نیں
اتن پدمنی وانگ سُہاوندیاں نیں
باراں ذات تے ست سنات ڈُھکی
رنگ رنگدیاں صورتاں آؤندیاں نیں
اتے بھوچھن سن پنج تولئے دے
اتے لنگیاں تیڑ چنہاؤں دِیاں نیں
لکھ سٹھنی دین تے لین گالیں
واہ واہ کیہ سہرا گاؤندیاں نیں
پری ذات جٹیٹیاں نین خونی
ہیک مہین دے گاؤندیاں نیں
نال آرسی مکھڑا ویکھ سُندر
کول عاشقاں نوں ترساؤندیاں نیں
اِک وانگ بساطیاں کڈھ لاٹو
ویرا رادھ دِی ناف وکھاؤندیاں نیں
اِک تاوڑیاں ماردیاں نچدیاں نی
اِک ہسدیاں گھوڑیاں گاؤندیاں نیں
اِک گاؤں کے کوئلاں کانگ ہویاں
اِک راہ وِچ دوہڑے لاؤندیاں نیں
اِک آکھدیاں'' مور نہ مار میرا"
اک وچ ممولڑا گاؤندیاں نیں
وارثؔ شاہ جیوں شیر گڈھ پٹن
مکی لکھ سنگتاں زیارتیں آؤندیاں نیں
