ہیر وارث شاہ

آء جو گیا کیہا ایہہ دیس ڈِٹھو

آء جو گیا کیہا ایہہ دیس ڈِٹھو
پُچھن گھبرو بیٹھ وچ داریاں دے

اوتھے جھول مستانیاں کرے گلاں
سخن کن پاٹیاں پیاریاں دے

کراں کون سُلاہ میں کھیڑیاں دی
ڈار پھرن چوطرف کواریاں دے

مار عاشقاں نوں کرن چا بیرے
نین تِکھڑے نوک کٹاریاں دے

دین عاشقاں نوں توڑے نال نیناں
نین رہن نہیں ہر یاریاں دے

ایس جوبنے دیاں ونجاریاں نوں
ملے آن سوداگر یاریاں دے

سرمہ پُھل دنداسڑا سرخ مہندی
لُٹ لئے نیں ہٹ پساریاں دے

نیناں نال کلیجڑا چھِک کڈھن
دِسن بھولڑے مکھ وچاریاں دے

جوگی ویکھ کے آن چوگرد ہوئیاں
چُھٹے پر ہے وچ ناگ پٹاریاں دے

اوتھے کھول کے اکھیاں ہس پوندا
ڈِٹھے خواب وچ میل کواریاں دے

آن گِرد ہوئیاں بیٹھا وچ جھولے
بادشاہ جیوں وچ عماریاں دے

وارث ؔ شاہ نہ رہین نچلڑے بہہ
جنہاں نراں نوں شوق نیں ناریاں دے