ہیر وارث شاہ

سبھے سوہندیاں تِرنجنیں شاہ پریاں

سبھے سوہندیاں تِرنجنیں شاہ پریاں
جویں ترکشاں دیاں تُسیں کانیاں ہو

چل کرو انگشت فرشتیاں نوں
تسیں اصل شیطاں دیاں نانیاں ہو

تُساں شیخ سعدی نال مکر کیتا
تُسیں بُڈیاں شرور دیاں بانیاں ہو

اسیں کسے پردیس دے فقر آئے
تُسیں نال شریکاں دے ثانیاں ہو

جاؤ واسطے رب دے خیال چھڈو
ساڈے حال تھیں تُسیں بیگانیاں ہو

وارثؔ شاہ فقیر دیوانڑے نیں
تُسیں دانیاں اتے پردھانیاں ہو