ہیر وارث شاہ

ریس جوگیاں دی تیتھوں نہیں ہُندی

ریس جوگیاں دی تیتھوں نہیں ہُندی
ہونساں کیہاں جٹاں رکھائیاں دیاں

بے شرم دی مچھ جیوں پوچھ پدی
جیہاں منجراں بیٹ دے دھائیاں دیاں

تان سین جیہا راگ نہیں بن دا
لکھ صفاں جے ہون بھرائیاں دیاں

اکھیں ڈٹھیاں نہیں توں چوبرا وے
پرم کٹھیاں برہوں ستائیاں دیاں

سر مُن داڑھی کھیہ لائیائی
قدراں ڈٹھیوں ایڈیاںچائیاں دیاں

تیری چراچر برکدی جیبھ ایویں
جیوں مرکدیاں جتیاں سائیاں دیاں

لُنڈیاں نال گھلنا مندے بول بولن
نہیں چالیاں بھلیاں دیاں جائیاں دیاں

نہیں کعبیوں چوہڑا ہوئے واقف
خبراں جان دے چوہڑے کھائیاں دیاں

نہیں فقر دے بھیت دا ذرا واقف
خبراں تدھ نوں مہیں چرائیاں دیاں

چُتر سواہ بھرے ویکھ مگر لگوں
جویں کُتیاں ہون گسائیاں دیاں

جیہڑیاں سُون اجاڑ وچ وانگ خچر
قدراں اوہ کیہ جان دیاں دائیاں دیاں

گدوں وانگ جاں رجیوں کریں مستی
کچھاں سنگھنائیں رناں پرائیاں دیاں

بابو نہیں پورا تینوں کوئی ملیا
اجے ٹوہیوں بُکلاں مائیاں دیاں

پوچھاں گائیں توں مہیں دیاں جوڑنائیں
کھریاں مہیں نوں لاونائیں گائیاں دیاں

ہاسا ویکھ کے آوندا کے سفل دا ئی
گلاں طبع دیاں ویکھ خفائیاں دیاں

میاں کون چھڈاوسی آن تینوں
دھمکاں پون گیاں جدوں کٹائیاں دیاں

گلاں عشق دیوانیاں تھلیں رلیاں
کچے گھڑے تے ویہن لڑھائیاں دیاں

پریاں نال کیہ دیواں نوں آکھ لگے
جیہناں وکھیاں بھنیاں بھائیاں دیاں

ایہہ عشق کیہ جان دے چاک چوبر
خبراں جان دے روٹیاں دھائیاں دیاں

وارثؔ شاہ نہ بیٹیاں جنھاں جنیاں
قدراں جان دے نہیں جوائیاں دیاں