ہیر وارث شاہ

من ضَحَکَ ضُحِکَ حکم ہویا

من ضَحَکَ ضُحِکَ حکم ہویا
گل فقر دی نوںناہیں ہسیے نی

جو کجھ کہن فقیر سو رب کردا
آکھے فقر دے تھوں ناہیں نسیے نی

ہووے خیر تے دیہی دا روگ جائے
نِت پہنیے کھائیے وسیے نی

بھلا برا جو دیکھیے مشٹ کرئیے
بھیت فقر دا مول نہ دسیے نی

ہتھ بنھ فقیر تے صدق کیجے
نہیں سیلھیاں ٹوپیاں کھسیے نی

مُکھ کھول وکھا جو ہوویں چنگی
نی ایانیے بھولیے سسیے نی

رب آن سبب جاں میل داہے
خیر ہو جاندی نال لسیے نی

صلح کیتیاں فتح جے ہتھ آوے
کمر جنگ تے مول نہ کسیے نی

تیری درد دا سبھ علاج میتھے
وارثؔ شاہ نوں وید ناں دسیے نی