ہیر وارث شاہ

اڑیو آؤ کھاں بیٹھ کے گل گنیے

اڑیو آؤ کھاں بیٹھ کے گل گنیے
سَد گھلیاں سبَھ سہیلیاں نیں

کئی کواریاں کئی ویاہیاں نیں
چن جیہے سریر متھیلیاں نیں

رجوع آن ہوئیاں سبھے پاس سہتی
جویں گورو اگے سبھ چیلیاں نیں

جنہاں مانو تے باپ نُوں بھُن کھادا
مُنگ چِنے کواریاں کھیلیاں نیں

وچ ہیر سہتی دوویں بیٹھیاں نیں
دوا لے بیٹھیاں ارتھ مہیلیاں نیں

وارثؔ شاہ سنگار مہاوتاں نیں
جیویں ہتھنیاں قلعے نوں پیلیاں نیں