کھانا دانا

ایہ منہ کالے
جُھریاں والے

اک گھڑے وِچ دو رنگ پانی
راجہ رانی سُنو کہانی

کٹورے وِچ کٹورا
پُتر پیو نالوں گورا

ست پتاشے رنگو رنگ
محل وِچ جا کے اِکو رنگ

پنجاں جنیاں پنڈ چُکی جا رکھی دربار
ہنوں مان دھکا دِتا گئی سمندروں پار

پاروں آئے دو ملنگ
ساویاں ٹوپیاں اوہدے رنگ

جادو گر نے جادو کیتا
ہریل مار پنجرے وچ لیتا
ویکھو جادو گر دا حال
پاوے ہرا تے کڈھے لال

جے چلیوں شکار تاں، لیاویں سوچ وچار
چُنجھ بِن، دم بِن، نہ جیوندا نہ مویا

چونے گچ حویلی، بُوہا کوئی نہ

دیکھو یارو رن دی اڑی
سر منا کے کھارے چڑھی

رنگ بدامی انڈے ڈِٹھے
اماں لے پاوچ بھانڈے
پتلے پتلے چِھلڑ لاہ کے
پا مصالحہ خوب بناندے
یار پیارے سارے کھاندے
جوگی بھوگی پنڈت پاندھے

رنگ ونگیلی ہے اک ناری، شیش محل وچ رہندی اے
ایہنوں کوئی مونہہ نہ لاوے، پردے وِچ ایہہ کہندی اے
جو کوئی پائے عزت جائے، کاگا پانی اوس وکھائے
اپنی جاوے اوس دی رہوے، اُلٹی گنگا بہندی اے

رڑے مدان اک برن ڈِٹھا
ہڈیاں ٹوکریاں ماس مِٹھا

سونا اے پر سُنیا نہیں
روپا اے پر روپیہ نہیں

سیو نی اک مرد میں ڈِٹھا
وچوں کوڑا اُتوں مِٹھا

سونے دی تھالی جڑ اوندا ٹِکا
قلاقند کھا کے مونہہ پھکے دا پِھکا

طوطا بگلا کاں بٹیر
ایہناں چواں نوں آندا گھیر
گھیر گھار کے گُچھا کیتا
انت چواں دا لہو پیتا

کٹورے وِچ کٹورا
پُتر پیو نالوں گورا

کُکڑی دے آنڈے شوہ بگے بگے
گھول گھمایاں پوچھلیاں سر دھرتی لگے

کالا سی کلڑ سی
کالے پیو دا پُتر سی
آڈوں پانی پیندا سی
تے گوڑھی چھاویں بہندا سی

کھوہ وِچ ہرنی سوئی ، دیووے دُدھ ملائیاں
ساڈے گھر کاکا جمیا ، لوک دین ودھائیاں

لما جیہا ماہوں
اوہدی گِٹے داڑھی

نِکی جیہی کُڑی اوہدے ڈِھڈ وِچ ونڈ
جیہڑا اس نوں نرنے کھاوے رج کے پاوے ڈنڈ

ہری ڈنڈی تے سبز دانا
لوڑ پووے تے منگ کھانا

ہری سی من بھری سی
نال موتیاں جڑی سی
لالہ جی دے باغ وچ
دو شالہ اوڑھے کھڑی سی

ہسنا نہ سہیلیو، چلنا چِت سنسار
جو ہسیا سو لُٹیا اوسنے گھر بار