شاماں ویلے یاد آوندا اے اپنے گھار دا بوہا
خاباں دے وچ ہن تے سانوں واجاں مار دا بوہا
اپنی یاری نال فقیراں جہڑے مالک دل دے
اج تایں جاکے تکیا نہیں ہے کئیں زردار دا بوہا
بے پرواہی نال اساڈے بھاویں ورتو جنی
جیندے جی تے چھڈ نہیں سکدے ایہ سرکار دا بوہا
دل دی سدھر پھڑ کے انگلی لئے جاے سانوں اوتھے
پلکاں دے نال چمیئے جا اوس منٹھار دا بوہا
عملوں خالی سوچ سکندرا توں ایں کہڑی گنتی
ون سونے مَلّی بیٹھے سوہنے یار دا بوہا
