نیناں وِچ جگراتے نچے
فکراں گِدّھے پائے
آس نکڑمی پائے بولیاں
اتے جگ نُوں سمجھ نہ آئے
نی میں کیکن دسّاں
نی میں کیکن دسّاں
کس سجن دی بھال اساکوں
کون اساڈا دردی
کون جو عیسٰی مُڑ کے آؤنا
پئی خلق اُڈیکاں کر دی
نی میں کیکن دسّاں
نی میں کیکن دسّاں
اجے نیناں دے پتن سُنّجے
اجے مُسافر آنے
اجے نہ آس بھرِٹنا چھڈے
تانگھ دے تنبُو تانے
نی میں کِیکن دسّاں
نی میں کیکن دسّاں
گھُوک چر کھڑیا مِٹھڑی گھو کر
کوئی اُتر پہاڑوں آوے
کیلے ناگ سمے دا زہری
کوئی ایہ جِہی بِین وجاوے
کون جوگی جہدی بِین سُہانی
نی میں کیکن دسّاں
نی میں کیکن دسّاں
