حُقّہ

میں بابے دا محرم حُقہّ
میتھوں ججا قسم چوالے
میں بابے دا قاتل نئیں 
میں بابے دا کلہا یار
جو بابے دے مرن دے ویلے بھکدا نئیں سی
جے ایہ ملزم بھکدا ہوندا
گڑ گڑ کر کے گلیّں لا کے 
ایہ بابے نوں مرن ناں دیندا
میں بابے دا محرم حُقہّ
میتھوں ججاقسم چوالے
میں بابے دا قاتل نئیں 
سچ پچھیں تے
اس بابے نوں پہلی کھنگ اودوں آئی سی
جد بابے طیفے دی ماں نوں 
نو نہہ دے ہتھوں مر دیاں ڈٹھا
ہاں وے ججا
اس بابے دا پہلا اتھرو اودوں ڈگا
جد بابے دی بابی مر گئی
میں بابے دا محرم حقہ
میتھوں ججا قسم چوالے
میں بابے دا قاتل نئیں 
تے سن ججا
اس بابے نوں پہلا دوُرہ اودوں ہویا
جد بابے دا منجی بستر
تے بابے دا نان پیالہ
وکھرا ہویا
میں بابے دا محرم حقہ
میتھوں ججا قسم چوالے
میں بابے دا قاتل نئیں 
بابا مارن والے قاتل
اوہ نیں جہڑے 
اپنی کھیڈ کھلارن دے لئی
بڈھا بابا وکھرا کر کے
تیرے در تے آجاندے نیں 
میں بابے دا قاتل نئیں