لُچے نوں سردار بنایا ہویا اے

لُچے نوں سردار بنایا ہویا اےایہ ہاسا تلوار بنایا ہویا اے قسمیں میری چُپ دا کھٹیا کھانا ایںمیں تیرا کردار بنایا ہویا اے ہک صحرا دے ریتاں پار لکائے نیںہک دریا دا پار بنایا ہویا اے بہتا ویکھن مینوں ہن سبھاؤندا نئیںمیں اکھاں دا وار بنایا ہویا اے سینے اندر سارا کجھ شکیتی اےمیں اپنا […]

لُچے نوں سردار بنایا ہویا اے
ایہ ہاسا تلوار بنایا ہویا اے

قسمیں میری چُپ دا کھٹیا کھانا ایں
میں تیرا کردار بنایا ہویا اے

ہک صحرا دے ریتاں پار لکائے نیں
ہک دریا دا پار بنایا ہویا اے

بہتا ویکھن مینوں ہن سبھاؤندا نئیں
میں اکھاں دا وار بنایا ہویا اے

سینے اندر سارا کجھ شکیتی اے
میں اپنا دربار بنایا ہویا اے

اگاں دا مل پالے آن ودھایا اے
رتاں کاروبار بنایا ہویا اے

ہک بوہے نوں ڈر دے تالے لگے نیں
ہک بوہا دیوار بنایا ہویا اے

میری ضد نیں بھیڑی کیتی لیکاں نال
ہن ہتھاں بے کار بنایا ہویا اے

کیہ آکھاں میں بے وزنے جہے بندے دا
میں ککھاں دا بھار بنایا ہویا اے

ہن پردیس نوں کیویں آکھاں بھیڑا میں
میں ایتھے گھر بار بنایا ہویا اے

تیرے ہتھ دی سٹ نئی لگدی پنڈے نوں
توں مینوں بیمار بنایا ہویا اے