سبھ توں خطرناک

کرت دی لُٹ سبھ توں خطرناک نہیں ہندی
پولیس دی کُٹ سبھ توں خطرناک نہیں ہندی
غداری لوبھ دی مُٹھ سبھ توں خطرناک نہیں ہندی

بیٹھے ستیاں پھڑے جانا، بُرا تاں ہے
ڈرو جہی چُپ وِچ مڑھے جانا، برا تاں ہے
سبھ توں خطرناک نہیں ہندا

کپٹ دے شور وچ
صحیح ہندیاں وی دب جانا، برا تاں ہے
کسے جگنو دی لوء وچ پڑھن لگ جانا، برا تاں ہے
سبھ توں خطرناک نہیں ہندا

سبھ توں خطرناک ہندا ہے
مردہ شانتی نال بھر جانا
نہ ہونا تڑپ دا، سبھ سہن کر جانا
گھراں توں نکلنا کم تے
تے کم توں گھر جانا
سبھ توں خطرناک ہندا ہے
ساڈے سپنیاں دا مر جانا

سبھ توں خطرناک اوہ گھڑی ہندی ہے
تہاڈے گٹّ تے چلدی ہوئی وی جو
تہاڈی نظر دے لئی کھڑی ہندی ہے

سبھ توں خطرناک اوہ اکھ ہندی ہے
جو سبھ دیکھدی ہوئی وی ٹھنڈھی یخّ ہندی ہے
جس دی نظر دنیا نوں محبت نال چُمنا بُھل جاندی ہے
جو چیزاں چوں اٹھدی انھیپن دی بھاف اتے ڈُلھ جاندی ہے
جو نِت دسدے دی سادھارنتا نوں پیندی ہوئی
اک منتکہین دہراء دے گدھی-گیڑ وچ ہی رل جاندی ہے

سبھ توں خطرناک اوہ چن ہندا ہے
جو ہر قتل کانڈ دے بعد
سنّ ہوئے وہڑیاں وچّ چڑھدا ہے
پر تہاڈیاں اکھاں نوں مرچاں وانگ نہیں لڑدا ہے

سبھ توں خطرناک اوہ گیت ہندا ہے
تہاڈے کناں تکّ پہنچن لئی
جہڑا کیرنا النگھدا ہے
ڈرے ہوئے لوکاں دے بار موہرے
جو ویلی دی کھنگھ کھنگھدا ہے

سبھ توں خطرناک اوہ رات ہندی ہے
جو پیندی ہے جیؤندی روح دیاں آکاشاں تے
جہدے وچ صرف الو بولدے گدڑ ہوانکدے
چپٹ جاندے سدیوی نھیر بند بوہیاں چگاٹھاں تے

سبھ توں خطرناک اوہ دشا ہندی ہے
جہدے وِچ آتما دا سورج ڈُب جاوے
تے اس دی مری ہوئی دُھپ دی کوئی چھلتر
تہاڈے جسم دے پورب چ کُھبھ جاوے

کرت دی لُٹ سبھ توں خطرناک نہیں ہندی
پولیس دی کُٹ سبھ توں خطرناک نہیں ہندی
غداری لوبھ دی مُٹھ سبھ توں خطرناک نہیں ہندی