وَن دا بُوٹا

میں وَن دا سنگھنا بوٹا
ٹھنڈھیاں میریاں چھاواں
مِٹھیاں میریاں پیلُوں
وے توں راہیا جاندیا
بُھکھن بھانیا ماندیا
آ جا جھٹ کو ساہ لے
میریاں پیلوں کھا لے
میری چھاویں بہہ لے
میں وَن دا سنگھنا بوٹا
ٹھنڈھیاں میریاں چھاواں
کی ہویا پندھ سارا اگے
کی ہویا دن سر توں ڈھلیا
جیون پینڈا ڈونگھا منیا
پر اِنج دُھپے سڑیاں
دھدل پھکیاں
کجھ نہیں بندا
اوہو جھٹ سُہانے
جہڑے چھاواں ہیٹھ وِہانے
ایہہ چھاواں وی چار دہاڑے
چار دہاڑے جوبن
مُڑ پُتراں نے جھڑنا
اج آ کے بہہ لے تھلے
میں ون دا بوٹا سنگھنا
ٹھنڈھیاں میریاں چھاواں

حوالہ: جگراتے، شریف کنجاہی؛ 1958؛ صفحہ 18 ( ویکھو )