پھڑ کے ہتھ لکیراں ہتھ کیہ آیا اے
کِھدّو بن کے لیراں ہتھ کیہ آیا اے
کورے کاغذ ایویں اُڈدے پِھردے نیں
ان لکھیاں تحریراں ہتھ کیہ آیا اے
مِرزے نوں تے عشق سلامت رکھے گا
صاحباں! تیرے ویراں ہتھ کیہ آیا اے؟
ہمت والے بازی جت کے لے گئے نیں
ویہلڑیاں تقدیراں ہتھ کیہ آیا اے
شیشے اگے شیشا دھریا ویلے دا
دو رُخیاں تصویراں ہتھ کیہ آیا اے
بالاناتھا! ہیر نے زہراں کھالیاں
تیرے پنجاں پیراں ہتھ کیہ آیا اے؟
جھلّی طاؔہرا نوں وی ماں سمجھاوندی رہی
سسیاں، سوہنیاں، ہیراں ہتھ کیہ آیا اے
حوالہ: شیشہ، طاہرہ سرا؛ سانجھ لاہور 2018؛ صفحہ 17 ( ویکھو )
