صلہ پیار دا ویریا قہر تے نئیں

صلہ پیار دا ویریا قہر تے نئیں
تینوں دل ای دتا اے زہر تے نئیں

ہر بندے دے ہتھ اے اٹ روڑا
ایہہ شہر وی تیرا ای شہر تے نئیں

ساہواں نال ای جاوے گا غم تیرا
کنج سُکے گی اکھ اے نہر تے نئیں

یار ہس کے لنگھے نے غیر وانگوں
میرے لیکھ دا پچھلا پہر تے نئیں

ہتھیں سینکھیا دتا ای نفرتاں دا
ہن کدی جے کہویں وی ٹھہر تے نئیں

حوالہ: برفاں ہیٹھ تندور، پہلا پیر پبلی کیشنز اسلام آباد؛ صفحہ 99 ( ویکھو )