بھورا روح دا ہو اداس ٹریا
لمے وہن پا کے اﷲ آنیاں نوں
جاندے روح نوں بت پکار کیتی
کتھے چلئیں چھڈّ نمانیاں نوں
مینوں بنی تے ہور بنائیو ای
بدھے بھار او یار پلانیاں نوں
سوہنی وچ جھناؤں دے ڈوب چلیوں
مچھّ کچھّ سنسار دے کھانیاں نوں
جاندی وار نہ کیتی آ گلّ کوئی
پچھا دتا ای عمر وہانیاں نوں
ادھی رات کروانیاں کوچ کیتا
چھڈّ چلیوں تنبوآں تانیاں نوں
وچ شہہ دریا دے ڈوب چلیوں
سبھے مال متاع پلانیاں نوں
پہلے یار بنائیو پیار سیتی
پچھوں ماریو کلّ سیانیاں نوں
وانگ باز دے تیز پرواز کیتو
راز دسیو نہ اننجانیاں نوں
نام ربّ دے منّ سوال میرا
گل لا اک وار نمانیاں نوں
ڈوب سوہنی نوں کہڑی ولّ ویسیں
یارا دسّ کے جاہ ٹکانیاں نوں
نہیں کم اصیل دا چھڈّ دینا
یاراں بیلیاں بہت پرانیاں نوں
کاہنوں جادوڑا پائی کے ٹھگیو ای
مہینوال توں گھول گھمانیاں نوں
کہنوں سونپ چلیوں وچ نیں دے اوئے
اساں عاجزاں درد رننجانیاں نوں
نہں نال پردیسیاں بھلّ لایا
کھیت بیجیا بُھنیاں دانیاں نوں
فضل شاہ میاں ایویں لیکھ آہے
موڑے کون خداء دے بھانیاں نوں
