اک شہر گجرات جھناؤں کنڈھے
اوہدے وچ تُلا گھمیار آہا
اتم جات نجیب نصیب والا
مشہور دربار سرکار آہا
افلاطون لقمان شاگرد اُسدے
عقل ہوش دا بہت ہُشیار آہا
گوئیا چین دا سی چینی ساز تُلا
نال کسب کمال وہار آہا
کوزے بادیئے کرے تیار ایسے
جس دیکھیا سو طلب گار آہا
جا کے نظر گزاردا پیش شاہاں
ایس چال کولوں مالدار آہا
سارا ملک پنجاب اوہدے بھانڈیاں دا
بڑے شوق سیتی خرید دار آہا
فضل شاہ ہر صفت موصوف تُلا
نیک نام بے انت شمار آہا
