یوسف نال فراق دے آہ ماری
وہِ ملی تینوں تقدیر بیلی
پاش پاش زلیخاں دا جیؤ ہویا
جہڑی عاشقاں دے وچ پیر بیلی
مجنوں بانہہ الار پکار کیتی
باہیں بھنّ گیوں میرے ویر بیلی
لیلی لے لئی دکھ درد غم نے
پایا فیض فراقَ وہیر بیلی
فرہاد فریاد فریاد کیتی
لگا کار کلیجڑے تیر بیلی
کوڑے گہر غم دے شیریں گھٹّ بھردی
ڈلھ پیا اکھیں سندا نیر بیلی
رانجھے سندا سینہ چاک ہویا
نالے کھڑی رووے کول ہیر بیلی
مچھی وانگ پیا پُنوں تڑفدا سی
دتا خاک رلا سریر بیلی
کھلھے وال ڈلہے نین وین کردی
سسی وحشیاں دی تصویر بیلی
مرزا کوکدا سی ہائے ہائِے یارو
مینوں گئے بنائے فقیر بیلی
رُنی صاحباں بھی اچی مار چیکاں
گئے تیر غم دے سینہ چیر بیلی
ماہی یار کوکے یار یار کر کے
کیتا درد فراق ظہیر بیلی
چندن بدن نے خاک رلا دتا
سوہنا بدن جو ماہ منیر بیلی
فضل ہور کروڑ ہجوم آہا
ناہیں وچ تحریر تقریر بیلی
