میرے ملن سندی جیکر سِکّ تینوں
دساں اپنا تھاں مکان بیلی
نواں کوٹ لاہور دی طرف دکھن
پینڈا نیم پھرسنگ دا جان بیلی
اوس جگہ تے میں وسنیک کیتی
گلّ عشقَ دی کلّ بیان بیلی
ویہویں سال اندر میرا پیر آہا
کیتا خضر مینوں خیر دان بیلی
کیتی جوڑ کتاب درست ساری
روضے چودھویں ماہ رمضان بیلی
ہجرت نبی کریم تھیں گئے آہے
بارھاں سے تے پینہٹھ پچھان بیلی
اکھیں کھولھ کے ویکھ پیاریاں دے
کیتا عشقَ دا بحر روان بیلی
جیکر عشقَ تھیں ملے مقصود تیرا
میتھیں کریں توں درد عیان بیلی
اچھا جان ناہیں، جنہاں عشقَ ناہیں
تنھاں مول نہ دین ایمان بیلی
دامن عشقَ دے لگیاں یار ملدا
لئیں سمجھ نہ تھیؤ ندان بیلی
میں بھی عشقَ دا پلڑا پکڑیا سی
ملیا یار میرا جیؤ جان بیلی
فضل شاہ سندی ہوئی عشقَ ولوں
کلمہ نبی دے نال زبان بیلی
