ورھے بارھویں وچ پرِوار سوہنی
جِویں چودھوی چند پروار بیلی
ترنجن وچ بیٹھی سیئاں نال سوہنی
پین چرخیاں دے گُھمکار بیلی
کوئی دئے جوٹے کوئی دئے پُونی
کوئی کتدی بانہہ اُلار بیلی
کوئی ملے دنداسڑا کوئی سرخی
کوئی لاوندی ہار شنگار بیلی
کوئی پا سرمہ کوئی پا کجّل
نوکدار رکھے کالی دھار بیلی
کوئی حسن تے ہو مغرور بیٹھی
کوئی گلّ کردی نال پیار بیلی
کوئی تیز نگاہ دے نال ویکھے
تِکھے نین جیوں تیز کٹار بیلی
کوئی پھاہنے واسطے عاشقاں دے
پائے زلفاں دے پیچ سوار بیلی
سئیاں اک توں اک چڑھیندیاں سن
ایپر سوہنی سی سردار بیلی
فضل شاہ تعریف ہن سوہنی دی
اسیں آکھدے ہاں مزیدار بیلی
