ورھے تیرویں نوں عزت بیگ تائیں
ہتھ تیر کمان پھڑان بیلی
تیرنداز استاد میدان جا کے
نت تیر چلان سکھان بیلی
کول بیٹھ جاون تیرنداز سارے
کرن قاعدے کل آیان بیلی
سجا پیر پچھے کھبا پیر اگے
کھچو زلف دی طرف کمان بیلی
بازو راس کرکے تیر صاف مارے
رکھے وچ نشان دھیان بیلی
وقت کھچن دے بانہہ نہ مول ڈولے
ساہ گھٹنا جان پچھان بیلی
مرزا عقل تے علم دا کوٹ آہا
لیا سمجھ تمام بیان بیلی
ایسے تیر تدبیر دے نال مارے
چیر خاک تودے نکل جان بیلی
آہا وانگ تقدیر نے تیر اس دے
اوکھا مڑن باجھوں لیاں جان بیلی
فضل شاہ ایسا تیرنداز ہویا
رہے کل استاد حیران بیلی
