تسلیمات کرکے عزت بیگ مرزا
تحفے نظر گزاردا جا میاں
لکھ موہر دتی پاتشاہ اس نوں
بھارا ہور دتا سروپا میاں
گھوڑا سوکھ سمندر عطا کیتا
سکے سنم لنگھے دریا میاں
کیتا چا معاف وصول اسنوں
کیتی ہور جگیر عطا میاں
پہلے حمد خداء بجائے لیاوے
پھیر شاہ دی کرے ثناء میاں
دنیاں وچ رکھے ربّ شاد تینوں
آخر دے جزا خدا میاں
جمشید فریدوں کاؤس خسرو
تیرے مرتبے دی خاک پا میاں
نوشیرواں وانگ ہے عدل تیرا
ہاتھی کیڑیؤں کرے حیا میاں
حاتم کل جہان تے بخش کیتی
ایپر ایس دربار گدا میاں
دتا ربّ سکندری ملکھ تینوں
والی وارثی خلق بنا میاں
شیر گرگ رکھن خوف بکری تھیں
دتی ظلم دی بیخ اٹھا میاں
مرزا پائے انعام سلام کرکے
ڈیرے آ وڑیا نال چا میاں
نت سیر کرن دلی شہر اندر
جائ زین سمند تے پا میاں
اوڑک ہو اداس تیار ہو کے
کوئی روز اس طور لنگھا میاں
کرے طرف لاہور دی کوچ مرزا
سارا مال متاع لدا میاں
فضل شاہ لاہور دے وچ مرزا
پہنچا منزلو منزلی آ میاں
