رات خیر دے نال گزاریا نے
جیؤ وچ آرام قرار ہوئے
سندر چال کمال لاہور وا
سارے دیکھنے تے طلب گار ہوئے
دنے لائے پشاکیاں پہن بانے
کرن سیر بازار تیار ہوئے
جا کے ویکھیا شہر مثال جنت
ایپر ویکھنے تھیں گلزار ہوئے
بانکے طور لاہور دے لوک سارے
شگلدار آپو اپنے کار ہوئے
پھرن لٹکدے وچ بازار سوہنے
تکھے نین مثال کٹار ہوئے
کوئی سنے فریاد نہ عاشقاں دی
قتل باجھ تلوار ہزار ہوئے
آکھن ہور نہ شہر لاہور جیہا
سبھ شہر لاہور توں وار ہوئے
من بھانودے لئے خرید تحفے
سودے روک نہ مول ادھار ہوئے
اوڑک وطن تے جیؤ اداس ہویا
اوٹھ گھوڑیاں تے اسوار ہوئے
فضل شہر لاہور توں کوچ کرکے
وانگ باز دے تیز طرار ہوئے
