راوی لنگھ جھناں توں پار ہوئے
دوروں نظر پئی گجرات میاں
سورج گیا غروب ہو شام پئی
اگوں منہ آئی کالی رات میاں
ڈیرے وچ سراں دے مار لتھے
لائی سرخ سفید قنات میاں
دو تنّ روز رہے جگہ دیکھ چنگی
کیتی نال لوکاں ملاقات میاں
پانی لال جھناء دے عشقَ رتے
عزت بیگ تائیں کیتا مات میاں
اگے جاونا بہت محال ہویا
یار آکھ رہے نیک ذات میاں
جیؤ لوچ لیندا چھیل سوہنیاں دا
ایہہ عشقَ سندی کرامات میاں
ایتھے ہور دا ہور فتور ہوسی
مرزا کھووسی ذات صفات میاں
سارا مال متاع لٹا دیسی
پیسی عشقَ دی آن آفات میاں
فضل شاہ دیکھو عزت بیگ مرزا
ہوسی وچ گجرات دے گھات میاں
