اک روز عزت بیگ خوشی سیتی
محفل وچ بہشت بناوندا جے
کئی گائیکاں ہور کلاؤتاں نوں
مرزا گھلّ پیغام سداوندا جے
وارو وار لگے رنگ راگ کرنے
ویلے وقت دا راگ سناوندا جے
کوئی کہے بہاگ تے ہور بھیرو
رامکلی تھیں جیو لکھاوندا جے
کوئی کہے بلاول تے ہور ٹوڈی
کوئی ساوری تے زور پاوندا جے
کوئی بھیروی گاوندا ہور آسا
کوئی سندھ تلنگ بجاوندا جے
کوئی ساز آواز نوں اک کرکے
ملھار تھیں مینہہ برساوندا جے
کوئی سارنگ کوئی دھناسری نوں
تانسین دی ہوش بھلاوندا جے
کوئی جوگ نمانی نوں منہ کرکے
دلوں صبر قرار لے جاوندا جے
کوئی کہے بلاول شوق سیتی
کوئی چتّ پہاڑی تے لاوندا جے
کوئی پوربا پوربی ہور پیلو
بروا نال پیار الاوندا جے
کوئی سورٹھ کانڑا بنگلا بھی
مالکونس ببھاس نوں گاوندا جے
کوئی شام کلیان دی تان مارے
کوئی نٹ کلیان سناوندا جے
کوئی بھرے کھماچ بنگالڑی نوں
کوئی گوڑیوں تان اٹھاوندا جے
کوئی کہے گھوڑی کوئی للت پنچم
کوئی دیپک گونڈ الاوندا جے
فضل شاہ وڈہنس ہنڈول کوئی
مولسری تھیں جیو چلاوندا جے
