آ کے سوہنی دا حسن بیان کرنا
اک روز مرزے عزت بیگ تائیں
کوئی آن کے گلّ سنانودا جے
تُلا نام گھمیار ہے ذات اتم
کجے بادیئے خوب بناوندا ج
اک بادیا ملّ منگائے دیکھو
جیکر دیکھنے نوں جی چانہودا جے
دتا بھیج غلام شتاب مرزے
جاء پہنچیا پچھ پچھاوندا جے
اگے کتدی سی سئیاں نال سوہنی
جس وقت غلام سدھاوندا جے
حسن دیکھ غلام غلام ہویا
بناں موت آئی مر جاوندا جے
صاحب بھیجیا ونج وہاجنے نوں
ہتھوں اپنا آپ وکاوندا جے
ایپر ڈاڈھ دے کے جیو اپنے نوں
تلے ولّ ہی پیر اٹھاوندا جے
آکھے بادیا اک خریدنا ہے
تُلا کڈھ دو چار پھڑاوندا جے
سبھ اک توں اک چڑھندڑے سن
اک پکڑ لیا من بھاوندا جے
اک درم تھیں ملّ خرید کرکے
عزت بیگ دے پاس لے جاوندا جے
مرزا دیکھ کے بہت خوش حال ہویا
مڑ مڑ دوستاں پیا دکھاوندا جے
ایسے خوشی دے وچ غلام یارو
ویکھو ہور فتور کی پاوندا جے
سوہنا چھیل سزادڑا مچھّ بھنا
چھری عشقَ دی نال کہاوندا جے
ایپر کجھ غلام نوں دوش ناہیں
کیہڑا لکھیا لیکھ مٹاوندا جے
جو کجھ ویکھیا سی عزت بیگ تائیں،ٓ
ہتھ جوڑ غلام سناوندا جے
آکھے اک محبوب میں ویکھ آیا
ایسے ویکھنے وچ نہ آوندا جے
ایپر دھی تُلے گھمیار دی ہے
سورج ویکھ اس نوں شرماوندا جے
چہرہ چودھویں رات دا چن آہا
ہتھوں چند دا چند سداوندا جے
پلکاں تیر زلف زنجیر اس دی
گویا ناگ کالا کنڈل پاوندا جے
آدم کون جو نانہہ بے ہوش ہووے
نوری ملک بھی ہوش بھلاوندا جے
مرداں وچ جیوں حسن کمال تیرا
تویں اسدا روپ سہاوندا جے
کچھ پچھ نہ صاحبہ مول میتھوں
صاحب نام غلام دھراوندا جے
گلّ سندیاں پکڑ ہو گئی اس نوں،ٓ
باجھ دیکھیاں حالَ ونجاوندا جے
وچوں سانگ محبوب دی بھال گئیا،ٓ
پر ظاہرا نہ لکھاوندا جے
گلّ عشقَ دی تھیں گل عشقَ پیا
کلا ستڑی پیا جگاوندا جے
آکھے چل محبوب دکھال مینوں
جہڑا زلف دے ناگ لڑاوندا جے
ترنت نال غلام رواں ہویا
اسی جاء لے جا پہنچاوندا جے
دیکھ تُلے نوں ادب اداب سیتی
مرزا دعا سلام بلاوندا جے
تلے منّ سلام قبول کیتی
کرو حکم جو جی مناوندا جے
اس دی بات سن کے عزت بیگ مرزا
ادب نال ایہہ عرض سناوندا جے
کجے پیالڑے کجھ خریدنے میں
فضل شاہ مرزا فرماوندا جے
