تلا کم دے وچ مشغول آہا
ایپر کم ہیسی تتے تا جانی
سدے نال پیار دے سوہنی نوں
آ کے بھانڈڑے ایہناں وکھا جانی
جویں بدلاں تھیں چند باہر آوے
سوہنی نکلی نال ادا جانی
صورتَ سوہنی دیکھ کے سوہنی دی
عزت بیگ ڈگا غش کھا جانی
مونہوں آکھ اﷲ بیلی پکڑ باہوں
لئے ترت غلام اٹھا جانی
سوہنی دیکھ کے ہو حیران کھلی
تلا رنگ نوں لئے وٹا جانی
اکھیں نال غلام نے دسّ دتا
ایتھے کوئی فریب بنا جانی
آکھے پیر رضائے تھیں چل گیا
ایپر رکھیا آپ خدا جانی
اوڑک بھانڈڑے دے دکھائے سوہنی
عزت بیگ نوں نال لے جا جانی
کوئی چیز پسند نہ آوندی اے
کیتا بہت وٹا سٹا جانی
مکھ دیکھنے دی اصل بھکھ اس نوں
ہویا ایس تھیں موڑ مڑا جانی
کہیا ہور تھیں جاء خرید ویرا
سوہنی ہوئی کے بہت خفا جانی
جدوں جھڑک محبوب دی کار ہوئی
کہے پھیر نہ کجھ درھا جانی
ایپر جھڑک کیہی یارو سانگ آہی
گئی جیؤ تے جان جلا جانی
مرزے سمجھیا بہت مخول سندا
اوڑک لئے دو چار چکا جانی
جو کجھ مکھ تھیں منگیا سوہنی نے
دتا ترنت پلے وچ پا جانی
جھلّ سانگ پیاریاں سجناں دی
ڈیرے آیا حالَ وننجا جانی
لگا زخم اولڑا عشقَ والا
گئی پیڑ کلیجڑے دھا جانی
یار ویکھ کے حالَ بےحال اس دا
کلّ گلّ پچھن پاس آ جانی
رنگ زرد تے ہائے ہائے کوکیں
ایہہ کیہی بنی تیرے بھا جانی
آکھے پیڑ کلیجڑے کار مینوں
کوئی ہاضمہ نہیں گزا جانی
جیون اپنے توں ہتھ دھوء بیٹھا
کوئی واہ لاوے مینتھے آ جانی
یاراں رو کیہا جیوے جان تیری
ہنے ہووسی تدھ شفا جانی
سرکہ خاص انگوری تے عرق کئی
رہے شربت یار پلا جانی
کارن نبض دکھالنے یار سندی
لئے حکمتی کل سدا جانی
بلدی اگّ تے تیل پلٹیو نے
دین کاہڑیاں نال جلا جانی
کجھ فرق نہ پیندڑا مول یارو
رہے زور طبیب لگا جانی
اصلی مرض نہ کوئی پچھان سکے
آئے نام حکیم رکھا جانی
دکھ ہور تے ہور دوا کیتی
مکھ یار دا اصل دوا جانی
عشقَ مشک دوویں چھپے رہن ناہیں
اوڑک گلّ گئے یار پا جانی
مرزا روئی کے کہے غلام تائیں
چل پھیر محبوب دکھا جانی
آکھے صاحبہ اج موقوف رکھو
دیو گلّ نوں دلوں بھلا جانی
متاں سمجھ جاوے باپ سوہنی دا
بہتے پھیریاں وچ خطا جانی
جیکر صبر کرسیں ملسی عرض تینوں
نت فظر نوں جان ٹھرھا جانی
ساعت اس نوں سال مثال آہی
کویں بھلک تے کرے ٹکا جانی
اوسے حالَ اندر عزت بیگ سندی
گئی قہر دی رات وہا جانی
ہوئی فجر غلام نوں نال لیا
گیا گھر تلے کر دھا جانی
تلا وچ نماز گداز آہا
دوویں ہو کھلے اک دا جانی
جدوں پھیر دعا سلام منگی
کرن پھیر سلام دعا جانی
صبح وقت سوہنی باہر نکلی سی
آفتاب دی جا بجا جانی
پالا رات والا اس دا دور کیتا
سورج حسن دے زور شعاع جانی
گیا پھلّ قلوب دا پھلّ اوویں
دتی آس خداء پجا جانی ۔
مکھ ویکھیاں دکھ تے درد سارے
یک بار سن گئے سدھا جانی
خوشی نال کیہا بھانڈے ہور دیوو
تلا کرے ہوالڑے چا جانی
کجھ پیالڑے تے کجھ بادیئے وی
لیندے ویکھ کے ملّ کرا جانی
فضل شاہ محبوب دی چاہ کارن
نت جان دی پھڑی ادا جانی
