اک روز غلام نوں سدّ آکھے
میتھوں بھانڈڑے نانہہ سامان بیلی
بہت نیک صلاحَ غلام دتی
کڈھی وچ گجرات دوکان بیلی
بھانڈے جوڑ سارے پالو پال رکھے
کرکے خوب صفا مکان بیلی
کھلھا دست خرید فروخت اندر
لگے بھانڈڑے کل وکان بیلی
بھانڈے ویچنے کل فریب آہا
ہیسی یار دی طرف دھیان بیلی
نت ایس بہانڑے دیکھدا سی
جہڑے یار لایا سینے بان بیلی
دیکھو عشقَ دا ونج وپار یارو
مہنگے لئے سستے دوے آن بیلی
ایس گھاٹڑے نوں لاہا جاندا سی
عقل عشقَ دا ویر پچھان بیلی
ایسا گھاٹڑا جس ونجارڑے نوں
کچرک رہسیا وچ ایمان بیلی
اوڑک دمّ سارے کم ہو گئے
کیتے کم قضاء خزان بیلی
پہرہ زحل مریخ دا آن ہویا
سٹے مشتری تیر کمان بیلی
جو کجھ بھاگ متھے اتے لکھیا سی
آئے برے نصیب ندان بیلی
جتھے قہر خداء نزول کرسی
دسّ کون ہووے مہربان بیلی
ہوئے یار تمام بے زار اس توں
چار روز دے سن مہمان بیلی
چھڈّ گئے پردیس اکلڑے نوں
آپو دھاپ ہو گئے روان بیلی
نہ اوہ اوٹھ نہ مال سداگری دا
ہوئی کل متعہ ویران بیلی
نہ اوہ رہا غلام نہ یار جانی
ہویا ہور دا ہور سامان بیلی
جہڑے یار اتے غمخار آہے
سو بھی ہوئے گئے خان جان بیلی
دکھ درد فراقَ نزول ہوئے
پریشان ہویا، پریشان بیلی
اچنچیت خزاں نے کم کیتا
نہ کجھ شان نہ کجھ گمان بیلی
اکا کھان جوگا پلے نہ رہا
سبھ ٹٹّ گئے مان تان بیلی
دو تنّ روز ادھار لیا ویچے
ایپر گھاٹڑے کم گوان بیلی
لئی مالکاں کھوہ دوکان اس توں
عزت بیگ ہو کھلا حیران بیلی
زر دا زور آہا سوئی ٹٹّ گیا
اوکھا آن ہویا آن جان بیلی
گھر یار دے کہڑے طور جاوے
دماں باجھ نہ کم اسان بیلی
ربا باجھ تیرے کس تے جاء کوکاں
توہیں عاجزاں دا نگہبان بیلی
میرا حالَ احوال معلوم تینوں
ویری جان ہویا اسمان بیلی
مینوں شاہ توں چاء گداء کیتا
تیریاں قدرتاں توں قربان بیلی
جس واسطے میں اس حالَ پہنچا
سو بھی جاندا نہیں ندان بیلی
وہل پائِے جے کدی بلایا میں
مارے سانگ مینوں چاڑھ سان بیلی
ایسا کون دردی دکھ درد میرے
مائی باپ نوں جا سنان بیلی
آپ جاندا ایں میرا حالَ سائیاں
کس واسطے کراں بیان بیلی
آئیاں کل مصیبتاں زور کرکے
کیتا آن فراقَ طوفان بیلی
میرے جیڈ نہ ہور دکھیار کوئی
اﷲ آپ ہویا قہروان بیلی
جیکر وخت پاوے شاہزادیاں نوں
در در اتے دھکے خان بیلی
فضل شاہ مصیبتاں پیش آئیاں
کی کراں بیان عیان بیلی
