اوڑک ماں نوں آکھیا سوہنی نے
جمعے مجھ نہ کجھ خطا مائی
عشقَ عشقَ دسیں وار وار مینوں
تیرے عشقَ دی خبر نہ کا مائی
بے تقصیر تائیں برا بولنی ایں
نالے دینی ہیں بری دعا مائی
پیاری دھی نوں چوریاں لاونی ایں
بھاویں ہور نے لیا چرا مائی
کی کچھ رنگ آہا ؟ کتنے قد ہیسی ؟
کس دے وچ توں رکھیا پا مائی
شالہ ہتھ سڑے اوہ جو عشقَ تیرا
جے میں کھولھ ڈٹھا، ہتھ لا مائی
یا اوہ کھان والی تیری چیز آہی
یا اوہ ورتنے دے وچ آ مائی
نال کامیاں دے کیکر لایا میں
ایہہ وی کھولھ کے حالَ سنا مائی
مینوں امبڑیئے کی پرواہ ہیسی
کردی ایڈ لکا چھپا مائی
لیندی روبرو جے مینوں لوڑ ہندی
نہ سی تدھ تھیں کجھ لکا مائی
توں بیؤجریاں نوں جھوٹھے عذر دیویں
اچی بولیوں دھم توں پا مائی
ویدن اپنے جیؤ دی دسّ مینوں
بھاویں بیٹھی ہیں کجھ توں کھا مائی
اگے انجھ توں کدے نہ مول کیتا
جویں اج کیتی میرے بھا مائی
جیکر مرض شدہ دا اثر ہویا
فضل شاہ نوں نبض دکھا مائی
