سوہنی رو کیہا ہے ظالمے نی !
مینوں ساڑ ناہیں مندے حالَ مائی
ایسی گلّ نہ آکھنوں سنگنی ہیں
بول بول مکھ سنبھال مائی
جو کچھ نہیں کرنی، کسے نہ کیتی
اج کر لے توں میرے نال مائی
کجھ کھا مرساں تیریاں بولیاں توں
ہور جال مائی، ہور جال مائی
ہن دیہہ نکھسمڑی خصم مینوں
پہلے دسیو ای مہینوال مائی
کویں نگھر زمین نہ مول گئی اے
نہ ایہہ جھوٹھ سندی اگّ بال مائی
ایہناں بولیاں توں مر جان لگا
میرا آن پجا ہن کال مائی
فضل شاہ سوہنی یار نال متی
مہینوال کوکے وال وال مائی
