پھیر کجھ جواب نہ ماؤں کیتا
کولوں اٹھ گئی غصے نال میاں
آکھے کھاونا انّ حرام ہویا
جچر نانہہ کڈھاں مہینوال میاں
کتوں گلّ سن کے تلا گھریں آیا
قہر غضب دے نال ملال میاں
گھر آوندے نوں ماں سوہنی دی
دتی اگّ اتے اگّ بال میاں
چاک مہیں چراونے رکھیو ای
اکے بیٹیاں دا چروال میاں
کامے چاک غلام تے ہور نوکر
ورلے ہون ایہہ نمک حلال میاں
دیہہ صاف جواب جاں گھریں آوے
مہیں چار جدوں مہینوال میاں
اج سوہنی نوں میں وی متّ دتی
سگوں بولیا سو مندے حالَ میاں
کر ویاہ کتے متاں سوہنی بھی
سٹے کوڑمے دا نام گال میاں
اتنے وچ باہروں مہینوال آیا
مہیں چار کے ہور خوش حال میاں
کھونڈی موڈھڑے تے مہیں سبھ پچھے
گھریں آئے پہنچا چالو چال میاں
مہینوال ڈٹھا دوویں قہر بھرے
نالے کرن بیٹھے کیل کال میاں
چور یار تائیں آپے کھڑک جاندی
گیا سمجھ ایہہ حالَ محال میاں
بھاویں گلّ ساڈی ظاہر ہو گئی
دتا یار نہ اج جمال میاں
فضل خیال ایسے مہینوال آہا
تلا کہے اکھیں کرکے لال میاں
