لے کے خط گئی طرف سوہنی دے
مہینوال دی موہر لگا بیلی
چوری سسّ کولوں خط یار والا
دیوے یار دے ہتھ پھڑا بیلی
یارو خط کیہا چن عید دا سی
مڑ مڑ جان نوں کرے فدا بیلی
جیوں جیوں پیچ کھولھے سوہنی خط والے
دیوے جیؤ دے پیچ گوا بیلی
نالے کرے مطالعہ خط چمے
رووے نال کلیجڑے لا بیلی
ڈٹھی رت ڈلھی اپر خط سوہنی
ایپر ویکھ ڈگی غش کھا بیلی
اگے سجرا پھٹّ چماندڑا سی
دوجی وار لایا یار گھا بیلی
طعنے تیز تلوار دی دھار کولوں
کردے گھائل نوں گھائل چا بیلی
طعنے یار والے آہے تیز خونی
گئے مڈھ کلیجڑے دھا بیلی
جدوں ہوش آئی اسے پیارڑی توں
لئی قلم دوات منگا بیلی
لکھے یار دے ولّ جواب نامہ
فضل حالَ دا خط بنا بیلی
(اس بند وچ ایہہ تک وی لکھی ملدی ہے:
آکھے ایہہ مرہم پھٹّ سیونے دی،
اٹھے پہر جو رہا دکھا بیلی)
