گڑھ بغداد دے اندر ہوئی مگروں ڈھول خرابی
شاہی اندر پیا اندھیرا بجھی مثال متابی
ڈھول شہزادے دا اک چاچا احمد نام سداوے
سُن کے بہت خوشی وچ آیا پیر شہید مناوے
جس دن ٹریا ڈھول شہزادہ نال اس مرگ نمانے
دھولر باغ بہاراں ملے مگروں امد کانے
بنھ کھڑے سبھ لشکر فوجاں راج حکومت شاہی
کڈھ گھراں تھیں باہر کیتی ڈھول راج دی مائی
پکڑ لیا سبھ اہل وزیراں فوجاں لشکر سارے
مل لیا سبھ راج حکومت باغ محل منارے
بن بیٹھا اوہ عادی مالک دیکھ جویں رب چاہے
رانیاں کڈھ گھراں تھیں باہر پائیاں دیس پرائے
ہوکا اتے منادی کیتی اندر شہر بازاراں
جو کوئی طعام کھلاوے ایہناں میں پھڑ اس نوں ماراں
جو کوئی دردی میرا آہا ایہناں سخت دکھاوے
دیساں اس توں ملک جاگیراں بڑا مراتب پاوے
ٹھوٹھے ہتھ پھڑائے ظالم کہے گدائی کراؤ
مونہہ سر کالا کھوتیاں اُتے ہر ہر گلی پھراؤ
ہرگز خیر نہ پاوے کوئی ایویں آکھ ٹھگاں دے
بال ایانے مگر لوائے خاک پئے سر پاندے
