اوڑک اک غلام سمی نے نمک حلال بلایا
کریں حلال نمک اج میرا ایوں کر آکھ سنایا
عشق ڈھول دا میرے اتے بنھ گھٹاں آ چڑھیا
جتنا مان حسن دا کردی عقل سنے لُٹ کھڑیا
جے توں نمک حلال کریں اج تاں میں تیتھوں واری
ایہہ احسان ادا نہ کرساں اندر زندگی ساری
بھیت میرے تھیں واقف ہیں توں اول آخر جانی
سختی دیکھ گئے نٹھ میتھوں سبھے شے پرانی
دیساں ملک جگیراں تینوں ہور انعام ہزاراں
گڑھ بغداد سنیندا آہا طرف اُجاڑ پہاڑاں
اوہ ڈھول منگیدڑ میہرا کرے حکومت شاہی
فوجاں لشکر مال خزانے تابع گرد نواہی
میں تڑپھیندی جان لباں تے اُس نوں خبر نہ کوئی
مالی باجھوں باغ ویرانہ شاخ ہری سبھ ہوئی
ایہہ لے چٹھی حال میرے دی گڑھ بغداد پہنچائیں
دیساں بہت انعام جاگیراں عمر ساری بہہ کھائیں
