میڈا عشق وی توں میڈا یار وی توں
میڈا دین وی توں ایمان وی توں
میڈا جسم وی توں میڈا روح وی توں
میڈا قلب وی توں جِند جان وی توں
میڈا کعبہ قبلہ مسجد منبر
مصحف تے قرآن وی توں
میڈے فرض فریضے، حج، زکوٰتاں
صوم صلوٰت اذان وی توں
میڈی زہد عبادت اطاعت تقویٰ
علم وی توں عرفان وی توں
میڈا ذکر وی توں میڈا فکر وی توں
میڈا ذوق وی توں وجدان وی توں
میڈا سانوال میتھرا شام سلونا
من موہن جانان وی توں
میڈا مرشد ہادی پیر طریقت
شیخ حقائق دان وی توں
میڈی آس امید تے کھٹیا وٹّیا
تکیہ مان تران وی توں
میڈا دھرم وی توں میڈا بھرم وی توں
میڈا شرم وی توں میڈا شان وی توں
میڈا ڈکھ سُکھ روون کِھلن وی توں
میڈا درد وی توں درمان وی توں
میڈا خوشیاں دا اسباب وی توں
میڈے سُولاں دا سامان وی توں
میڈا حسن تے بھاگ سہاگ وی توں
میڈا بخت تے نام نشان وی توں
میڈا ڈیکھن بھالن جاچن جوچن
سمجھن جان سنجان وی توں
میڈے ٹھڈرے ساہ تے مونجھ مونجھاری
ہنجھڑوں دے طوفان وی توں
میڈے تلک تلوے سیندھاں مانگاں
ناز نہورے تان وی توں
میڈی مہندی کجل مساگ وی توں
میڈی سرخی بیڑا پان وی توں
میڈی وحشت جوش جنون وی توں
میڈا گریہ آہ و فغان وی توں
میڈا شعر، عروض، قوافی توں
میڈا بحر وی توں اوزان وی توں
میڈا اوّل آخر اندر باہر
ظاہر تے پنہان وی توں
میڈا فردا تے دیروز وی توں
الیوم وی توں اَلآن وی توں
میڈا بادل برکھا کھمنیاں گاجاں
بارش تے باران وی توں
میڈا ملک ملیر تے مارو تھلڑا
روہی چولستان وی توں
جے یار فرید وبول کرے
سرکار وی توں سلطان وی توں
نہ تاں کہتر کمتر احقر ادنیٰ
لاشے لا امکان وی توں
